GEMEENTEVREUGDE Gesprekstemas vir selgemeentes

Tema Nr 2:       JESUS, DIE ALFA EN DIE OMEGA

Elektroniese kopie:  Oktober 2001.   Hierdie gesprekstema mag van die internet afgelaai en vermenigvuldig word.  Daar mag egter geensins aan die inhoud verander word nie.
Enige donasies vir die voortgang van die bediening word verwelkom.

Handleiding opgestel deur Marius Potgieter.

Hierdie gesprekstema is opgestel met die doel om
* die Skrif se lig op Jesus, die Mens wat die middelpunt van die heelal is, te laat val;
* gelowiges te help om hulle eenheid met Jesus deur sy Gees te besef en te beleef.

Hoe om die meeste seën uit hierdie gesprekstema te put:
* Beskou die gesprekstema slegs as ‘n hulpmiddel.
* Dit is nie ‘n handleiding vir Bybelstudie nie.  Die vrae handel nie in die eerste plek oor inligting of Bybelfeite nie maar help ons om regtig na die Here (wat deur sy Woord en Gees teenwoordig is) te luister.
* Enige persoon wat daarvoor kans sien, kan hierdie gesprek lei want dit vereis nie spesiale kennis of vernuf nie.
* Alhoewel die byeenkoms met ernstige gebed voorberei moet word, kan die gesprek nie voorberei word nie - dit word deur die Heilige Gees gelei.
* In God se oë is ons nie kerkmense wat bymekaar kom nie maar ‘n geestelike huisgesin; familielede wat rondom hulle Vader saam is om Hom en mekaar te geniet!

GESINSVERKLARING

TERUGRAPPORT: (20")
Wat het die Here die afgelope week vir jou gesê, gewys of geleer?

LOFPRYSING EN AANBIDDING: (20")

WOORD EN ANTWOORD: (40")
Tema:    Jesus, die Eerste
Lees:      Kolossense 1: 15 - 20

1.   Laat die verse twee maal hardop en rustig deurgelees word.  Lees dit weer ‘n keer biddend en in stilte deur.
2.   Vertel vir mekaar wat die Here hierdeur vir jou gesê het.
3.   Waarom, dink jy, moet Jesus die middelpunt wees van ons elkeen se lewe?
4.   Waarom moet Jesus die middelpunt wees van die selgemeente?
5.   Jesus as die middelpunt beteken dat Hy ons onverdeelde aandag, liefde en aanbidding ontvang.  Wat kan ons doen om dit elke dag ‘n werklikheid te maak?
6.   God woon ten volle in Jesus en Hy is die Mens wat die middelpunt van die heelal is.  As Hy so belangrik is, moet Hy die middelpunt van elkeen van ons se lewe en van ons groep se bestaan wees.  Alles moet om Hom draai - die Alfa en die Omega;  ons moet Hom tot in die kleinste besonderheid gehoorsaam.

Ons antwoord:   Watter voornemens het jy in jou hart as gevolg van hierdie bespreking?  Sien jy kans om volgende week van jou mislukkings en suksesse te vertel?

LIEFDESBEDIENING: (20")
Uitreik:   die selgemeente as geheel en elke persoon is geroep om betrokke te wees by die uitdra van die evangelie van Jesus oor die hele aarde.  Ons bid hierdie week dat ons gewillig sal word hiervoor.
Sorg na buite:   Jesus wil hê dat sy liefde deur ons sigbaar word in die omgewing.  Kom ons bid vir ander gelowiges wat nie by ‘n selgemeente ingeskakel is nie en vra die Here se besondere seën op hulle.
Onderlinge sorg:   is daar iets waarvoor ons saam met jou kan bid of vir die Here dankie sê?

VOLGENDE BYEENKOMS:
2 Korintiërs 5: 14 - 21 :  Jesus, die Redder

GESINSVERKLARING

TERUGRAPPORT: (20")
Wie wil vertel van enige mislukkings of suksesse met die uitvoering van verlede week se voornemens?

LOFPRYSING EN AANBIDDING: (20")

WOORD EN ANTWOORD: (40")
Tema:    Jesus, die Redder
Lees:     2 Korintiërs 5: 14 - 21.

1.   Lees die verse twee maal hardop en rustig deur.  Lees dit weer ‘n keer biddend en in stilte deur.
2.   Vertel wat die Here deur hierdie verse vir jou gesê het.
3.   Bespreek die stelling:  “Slegs Christus kan die versoening tussen God en ons bewerk”.
4.   Gesels oor die betekenis van die begrippe “ou” en “nuwe” soos ons dit hier kry.  Tot watter mate sien en beleef ons dit vandag?
5.   Jesus red deur versoening en vernuwing;  daarsonder sou ons nie die sonde kon oorwin nie.  Hy is die nuwe Mens wat ons nuut maak.  Hierdie besef moet ons tot ‘n dankbare selfoorgawe van ons lewe bring.

Ons antwoord:   Kom ons bid vir mekaar se lewensvernuwing - draai twee-twee na mekaar toe en bid vir mekaar.

LIEFDESBEDIENING: (20")
Uitreik:    ons kan uitreik deur ernstige gebed en so word ons “gebed-sendelinge”.  Kom ons bid hierdie week dat die Heilige Gees aan ons as geloofsgesin ‘n gees van gebed vir onbereikte mense sal gee.
Sorg na buite:   ons bid hierdie week dat die Here ons as sy verteenwoordigers sal gebruik in die lewe van diegene met wie ons daagliks te doen kry.
Onderlinge sorg:    laat elke gesinseenheid verantwoordelikheid aanvaar om in besonder vir ‘n ander gesinseenheid of persoon in die groep gedurende die komende week te bid.

VOLGENDE BYEENKOMS:
Johannes 1: 1 - 5 en 9:   Jesus, die Lig

GESINSVERKLARING

TERUGRAPPORT: (20")
Elkeen kry kans om te vertel:  hoe het jou lewe hierdie week saam met die Here verloop?

LOFPRYSING EN AANBIDDING: (20")

WOORD EN ANTWOORD: (40")
Tema:    Jesus, die Lig
Lees:     Johannes 1: 1 - 9.

1.   Laat die verse twee maal hardop en rustig deurgelees word.  Lees dit weer ‘n keer biddend en in stilte deur.
2.   Vertel vir mekaar wat die Here deur hierdie verse vir jou gesê het.
3.   Vertel hoe Johannes 1: 9 in jou lewe waar geword.
4.   Hoe lyk God se lig volgens Efesiërs 5: 9, 10 en 2 in die praktiese lewe van die gelowige?
5.   Die wese van God se lewe is liefde;  Jesus kom openbaar hierdie liefde aan ons en maak ons draers van die lig van God se liefde.  Hy oorwin die duisternis van die sonde en die dood as Hy ín ons en déúr ons sy liefde openbaar.

Ons antwoord:   Draai twee-twee na mekaar toe en sê vir mekaar wat julle voorneme is vir die week wat voorlê.

LIEFDESBEDIENING: (20")
Uitreik:    ons moet doelgerig bid vir gelowiges wat namens ons die evangelie in ander lande uitdra.  Vir wie behoort ons te bid?
Sorg na buite:    wie is julle bure?  Bid hierdie week spesiaal vir hulle by die naam.
Onderlinge sorg:    kom ons noem ons persoonlike behoeftes sodat ons vir mekaar kan bid.  Wie bid spesiaal vir wie hierdie week?

VOLGENDE BYEENKOMS:
Johannes 14: 18 - 23 en 15: 5  -  Jesus is op die aarde

GESINSVERKLARING

TERUGRAPPORT: (20")
Vertel hoe Jesus se lig die afgelope week in jou lewe sigbaar geword het.

LOFPRYSING EN AANBIDDING: (20")

WOORD EN ANTWOORD: (40")
Tema:    Jesus is op die aarde
Lees:     Johannes 14: 18 - 23 en 15: 5.

1.   Lees die verse twee maal hardop en rustig deur.  Lees dit weer ‘n keer biddend en in stilte deur.
2.   Vertel vir mekaar wat die Here hierdeur vir jou gesê het.
3.   Hoe kan ons vir Jesus sien - wat bedoel Hy in vers 19?
4.   Watter implikasies het vers 23 vir ons?
5.   Die enigste rede waarom kinders van die Here nog op aarde bly na hulle redding, is om Jesus se bediening as sy verteenwoordigers voort te sit.  Dit is die enigste taak wat die kerk van die Here as Hoof ontvang het.

Ons antwoord:    Wat het die Gees van Jesus vanaand op jou hart gelê om in hierdie komende week te doen?  Praat nou met die Here daaroor in stil gebed.

LIEFDESBEDIENING: (20")
Uitreik:   ons as selgemeente moet spesifiek en doelgerig bid vir bekeerlinge in heidenlande.  Hoe gaan ons die name van hierdie mense in die hande kry?
Sorg na buite:    die komende week bid ons spesiaal vir die Here se seën op die mense wat saam met ons werk.
Onderlinge sorg:   wat is jou grootste behoefte?  Watter gesinseenheid bid hierdie week vir watter gesin of persoon?

VOLGENDE BYEENKOMS:
Eenheid met Jesus deur sy Gees  -  Romeine 8: 9, 10, 14 - 17

GESINSVERKLARING

TERUGRAPPORT: (20")

LOFPRYSING EN AANBIDDING: (20")

WOORD EN ANTWOORD: (40")
Tema:    Eenheid met Jesus deur sy Gees
Lees:     Romeine 8: 9, 10, 14 - 17

1.   Lees die verse twee maal hardop en dan weer ‘n keer biddend en in stilte deur.  Stel jouself oop vir die Heilige Gees.
2.   Vertel vir mekaar wat die Here hierdeur vir jou gesê het.
3.   Bespreek:  “‘n Kind van die Here het nie noodwendig die Heilige Gees nie”.
4.   Die “julle” in vers 9 en 10 is belangrik.  Waarom?
5.   Dit voel soms of Jesus ver van ons af is;  watter gevare is daar wanneer ons op hierdie gevoel steun?
6.   Ons eenheid met Jesus is die heel belangrikste aspek van ons nuwe lewe - want Hy is nou ons lewe!  Hy kan nie in ons woon anders as deur sy Gees nie.  Hy woon nie slegs in individuele gelowiges nie maar Hy bind hulle ook saam tot ‘n lewende organisme.

Ons antwoord:   Sit in groepies van drie en praat oor wat jy kan doen om jou nuwe identiteit verder te laat realiseer.

LIEFDESBEDIENING: (20")
Uitreik:   ons moet by name en doelgerig bid vir onbereikte volksgroepe waar daar min gelowiges is.  Kom ons bid die volgende ses weke vir ses sulke volksgroepe.  Wie gaan vir ons volgende week meer inligting oor ten minste een so ‘n volksgroep saam bring?
Sorg na buite:   ons verteenwoordig Jesus.  Hoe gaan ons hierdie week sy liefde uitdra na siek mense in ons omgewing?
Onderlinge sorg:   wie sorg vir wie hierdie week?  Deel met mekaar vreugdes en behoeftes.  Bid vir mekaar.

VOLGENDE BYEENKOMS:
Eenheid met Jesus se liggaam - 1 Korintiërs 12: 12 - 14, 26

GESINSVERKLARING

TERUGRAPPORT: (20")
Vertel vir mekaar hoe jy die afgelope tyd bewus geword het van die werklikheid en majesteit van Jesus.

LOFPRYSING EN AANBIDDING: (20")

TERUGKYK: (20")
* ons leef nou reeds vir geruime tyd soos ‘n familie.  Wat sou jy sê is die belangrikste verandering wat dit in jou gebring het?
* Tot watter mate het ons geslaag om regtig met mekaar saam te leef  (bv.  in lief en leed; belangstelling; bemoediging; sosiaal; ens.)?
* Op watter terreine kan ons definitief verbeter?

VORENTOE-KYK:  (20”)
* Wat glo ons is die Here se doel met ons as geestelike huisgesin in die gemeente / gemeenskap waarin ons daagliks leef?
* Kom ons stel vir ons ‘n gebedsdoelwit wat uitbreiding betref:  hoeveel gesinne (enkelinge tel ook as gesinseenhede) wil ons graag oor die volgende ses maande die voorreg gee om deel van ons familie te word?
* Beplan om een naweek as groep saam weg te gaan.

LIEFDESBEDIENING: (20")
Uitreik:   nadat ons inligting gekry het, bid ons saam vir die onbereikte volksgroep waaroor ons verlede week gepraat het.
Sorg na buite:    daar is baie mense wat honger ly.  Hoe kan ons Jesus se liefde tasbaar na sulke mense uitdra?  Wat gaan ons hierdie week daaraan doen?
Onderlinge sorg:   watter behoeftes is daar vanaand by onsself waarvoor ons kan intree by Vader?  Wie bid vir wie hierdie week?

VOLGENDE BYEEKOMS:     Nuwe gesprekstema