1.    Staan voor die spieël
Bevesig die waarheid van jou posisie in Christus deur elke dag voor die spieël te gaan staan en vir jouself hardop die volgende te sê:
*   Ek is swak en kan niks uit myself doen nie.
*   Omdat ek met Jesus verenig is, is ek van God afhanklik en sal sy krag in my swakheid volbring word.
*   Ek is nou tot alles in staat deur Christus wat my krag gee; ek is met die gesag van Jesus beklee.
Moenie dink dat dit belaglik is nie.  Deur die waarheid herhaaldelik uit te spreek, word dit ‘n werklikheid in ‘n mens se lewe.

2.    ’n Tyd om te besluit
Dit is uiters noodsaaklik om elke dag ‘n tyd te hê vir beslissings oor die dag se werk.  Al het jy ‘n ingewikkelde dagboek-sisteem of ‘n eenvoudige “om te doen”-lysie, kry duidelikheid by die Here oor wat jy vandag ten opsigte van die kuddetjie, die selgemeente, moet doen.

3.    Praat met die Here oor hulle
Terwyl jy vir ‘n gesin of persoon voorbidding doen, wag vir leiding van die Here af.  As daar ‘n spesiale teksgedeelte in jou gedagte kom of ‘n besondere beeld, skryf dit neer en dra dit aan hulle oor.  So word hulle geloof versterk.

4.    Maak kontak met hulle
Kontak elke gesinseenheid elke week.  Dit is noodsaaklik.  So modelleer jy ‘n verhoudingskerk. Dit is maklik.  Kies elke week ‘n ander gesin om vinnig by in te loer en skakel die ander per telefoon.  As jy elke dag een gesinseenheid op jou lys sit, kry jy dit maklik reg.

5.    Dien die liggaam
Soek geleenthede om die gesinne in die selgemeente te dien.  Dit is meestal klein dingetjies wat die verskil maak.  Sodoende modelleer jy die wesenlike eienskap van die christenlewe, naamlik om te dien.

6.    Wees ‘n kindervriend
Moenie in jou voorbidding, jou besoekies en telefoongesprekke die kinders vergeet nie.  Hulle moet spesiale aandag kry.  Stel op hierdie manier ‘n voorbeeld vir die ander volwassenes.

7.    Wees ‘n fasiliteerder
In die selgemeente as liggaam van Jesus is elke gelowige ‘n liggaamsdeel.  Jou taak is om elkeen te help om sy/haar gawes te ontwikkel en te gebruik sodat dit die hele groep kan opbou.  Vra die Here vir ‘n fyn aanvoeling vir die gawes wat die Heilige Gees aan elkeen gegee het.

8.    Hou koers
Die herderleier het ‘n groot verantwoordelikheid om te sorg dat die selgemeente altyd God se visie oor oë hou.  ‘n Groep wat met ander dinge besig raak, verloor nie slegs sy bestaansreg nie maar ook entoesiasme en toewyding.

9.    Hou vas aan die breër geloofsgemeenskap
Wees self getrou in die omsienerskring saam met die ander herderleiers.  Sorg dat die selgemeente verstaan dat die breër kringe van geloofsgemeenskap uiters belangrik is.   Reël elke paar maande ‘n gesamentlike byeenkoms met ‘n ander selgemeente en leer weer by hulle.  Gaan almal saam na die eredienste en geniet dit as ‘n familiefees.

10.    Geniet dit!
Moenie jou funksie en verantwoordelikheid as ‘n swaar las sien nie maar as ‘n voorreg.  Jy het een van die wonderlikste en mees uitdagende funksies in Jesus se gemeente!  Sluit elke dag af deur die Here te dank vir  so ‘n voorreg wanneer jy jou kop op die kussing neerlê om te slaap.