GELOWIGES

Volgens die Skrif is die gemeente 'n gemeenskap van nuutgemaakte mense, 'n gemeenskap van gelowige gesinne. In die kerk is daar te veel mense sonder 'n persoonlike verhouding met Jesus Christus. Die Gemeentevreugde-model maak erns daarmee om sulke mense te help om die liefde van God in Christus te leer ken en daarop te antwoord. Prakties beteken dit dat enige persoon welkom is om byeenkomste van die selgemeente by te woon maar dat slegs mense met 'n lewende verhouding met Jesus Christus as volwaardige lede van die geloofsgesin aanvaar word.
 

LEWENSGEMEENSKAP

Die gemeenskap van gelowiges bestaan nie slegs by die eredienste en ander byeenkomste nie maar behoort lewensgemeenskap te wees wat die hele week duur. In die Gemeentevreugde-model word die lewensgemeenskap van gelowiges in al groter-wordende kringe 'n werklikheid. Dit beteken dat die klein-groep, die middelgroep sowel as die groot-groep belangrik is in die geloofslewe. Die selgemeente (of sel) is die mees basiese gestalte van geloofsgemeenskap maar is nie enigste nie. Die gemeente en die groter kerkverband is net so belangrik. Die selgemeente is soos 'n geestelike huisgesin terwyl die groter geloofskringe soos 'n familie is.
 

DIE HEILIGE GEES

Jesus Christus, die Hoof van die gemeente, is by sy kinders teenwoordig as die Heilige Gees. Die praktiese heerskappy van Jesus moet 'n daaglikse werklikheid vir die gelowige en die geloofsgemeenskap wees. In die Gemeentevreugde-model word elke gelowige geleer om voortdurend met die krag van die Heilige Gees onder sy leiding te lewe. Die selgemeentes soek die wil van die Here in hul uitbreiding, die aanwys van herder-leiers en ander leiers, asook in die proses van vermenigvuldiging. Niks moet uit blote menslike oorweging gedoen word nie: alles word na opregte gebed in gehoorsaamheid aan Hom gedoen.
 

DIE "AMP" VAN GELOWIGE

Die gelowiges het elkeen 'n plek in die selgemeente as liggaam van Christus. Elkeen staan in 'n voltydse bediening omdat elkeen geroep is om sy of haar medegelowiges te bedien. Elkeen het ook die taak om saam met die selgemeente of as enkeling mense in die samelewing te dien. Dit is immers die roeping van die geloofsgemeenskap: om die liggaam van Jesus te wees wat Hom sigbaar maak vir hierdie wêreld sodat hulle gered kan word.
 

GAWES VAN DIE HEILIGE GEES

Die diens van gelowiges hang ten nouste saam met hulle roeping en toerusting deur die Heilige Gees. Om Jesus se beeld in die wêreld in te dra, kan nie met menslike krag gedoen word nie - daarvoor is goddelike toerusting deur die Gees nodig. Dit is normaal dat die gawes van die Gees almeer in die selgemeentes sal funksioneer. Ons praat nie slegs, of in die eerste plek van die opspraakwekkende gawes nie maar die gawes wat Christus se bediening daagliks in en deur die selgemeente gestalte gee.
 

DIE AMPTE

In die Gereformeerde tradisie was die ampte nooit bedoel as heersende figure wat in formele verhoudings met die ander gelowiges staan nie. Gemeentevreugde soek na die vulling van die ampte met Skrifgegronde inhoud. Daar word sterk stelling ingeneem teen die hiërargiese tendens in die kerklike lewe. Alle leierskap moet 'n diensknegsgestalte vertoon. Boonop mag daar nie slegs een leiersfiguur optree in die geloofsgemeenskap nie maar moet daar korporatiewe leierskap wees deurdat gelowiges op verskillende terreine leiding neem. Gemeentevreugde neem sterk stelling in teen die "domineeskerk" waar iemand gehuur word om "die bediening" namens die ander te vervul.
 

UITREIK MET LIEFDE

Die doel van God met sy gemeente is dat Hy sigbaar sal word in die onselfsugtige en onvoorwaardelike, dienende liefde wat uitgeleef word deur geredde mense. Die selgemeente-model maak dit moontlik deurdat daar 'n struktuur is wat onderlinge liefde gestalte gee. Hierdie liefde moet oorvloei na die wêreld sodat mense na God getrek kan word. 'n Geloofsgemeenskap wat na binne lewe, is ongehoorsaam aan die Koning en het geen bestaansreg meer nie.
 

LIEFDEVOLLE DISSIPLINE

Een van die kenmerke van die ware kerk is die onderlinge dissipline waardeur die sonde oorwin en gekeer kan word. Dit kan slegs in 'n liefdesgemeenskap plaasvind. In die selgemeentes vind onderlinge vermaning spontaan plaas omdat gelowiges mekaar begin vertrou en genoeg vir mekaar omgee om mekaar te waarsku en vir mekaar te bid.
 

(Verskyn in "Gesellig" - 2 de uitgawe)